Chin Ramkulh Chung Thlichia Nih A Hrawhmi Inn 926 Caah SAC Ralhrang Nih Bawmhnak A Pek



Chin ramkulh chung ah Mokha thlichia nih a hrawhmi mipi inn, Building 926 caah SAC ralhrang nih canphio, thirkhenh hna cu Hakha khuapi um Department of State General Administration Hall ah nihin July 7, zing suimilam 10 ah bawmhnak a pek, tiah theih a si.

Bawmhnak peknak hmun ah SAC ralhang runvennak lei vuanci (Ministry of Defense) in pahnihnak ralbawi Min Nine, SAC ralhrang kuttang ṭuan Chin ramkulh vuanci Dr. Vung Suan Thang, Minister of Heritage Kyaw Nyein le Minister of Ethnic Affairs Sein Hla Tun hna zong an i tel, tiah theih chih a si.

Cu pinah SAC ralhang runvennak lei vuanci (Ministry of Defense) in pahnihnak ralbawi Min Nine nih thilchia nih a hrawhpiakmi hna caah tiin tangka Nuai 327.824 zong Chin ramkulh vuanci Dr. Vung Suan Thang sin ah a pek, tiah theih a si.

Cu hnu ah Chin ramkulh peng 6 chung ah thlichia nih a hrawhmi mipi hna caah bawmhnak an pekmi tangka hna cu Chin ramkulh vuanci Dr. Vung Suan Thang nih Hakha peng caah tangka in Nuai 29.830, Falam peng caah Nuai 22.675, Tedim peng caah Nuai 6.160, Matupi peng caah Nuai 224.645, Paletwa peng caah Nuai 64.739, Mindat peng caah Nuai 24.775 tiin a ṭhenphawt hna, tiah theih a si.

Chin ramkulh chung ah Mokha thlichia nih a hrawhnak hmun peng 6 chung ah lungtho tein a bawmchan tu hna caah peng pakhat ah tangka sing 5 cio tingco cio dingin sing 30 zong an bawmh chih hna, tiah theih chih a si.


TNLA Nih Ritnak Siivai Zuartu Le A Tawngmi Minung 80 An Tlaih Hna

Shan ramkulh chaklei Nam-hkam peng chung ah 2023, June 16 in 30 tiang ah ritnak siivai zuartu le a tawngmi minung 80 hna cu Ta'ang National Liberation Army (TNLA) nih an tlaih hna, tiah theih a si.

Palaung State Liberation Front (PSLF) le TNLA in Special Forces hna nih cheknak tuah le an umnak hmun luhhnawh in an tlaihmi hna an si i, ritnak siivai a tawngmi minung 73 le a zuartu 7 (An dihlak fonh) minung 80 an si, tiah PSLF/TNLA nih a langhter.

Tlaihkhih tongmi ritnak siivai a tongmi hna 80 chung ah Ta'ang miphun 29, Shan miphun 20, Kachin miphun 7, Tuluk miphun 13 le Kawl miphun 4 hna telh in a zuartu minung 7 an si. Riitnak siivai an tawnghnak hmunhma thlam pawl le an thilri pawl zong kan hrawhpiak dih hna, tiah an langhter chih.

Tlaihkhih a tongmi hna cu Palaung State Liberation Front (PSLF/TNLA) nih ritnak siivai dohnak phunghram ning in tazacuai an si lai, tiah PSLF/TNLA nih a langhter.




Post a Comment

0 Comments
* Please Don't Spam Here. All the Comments are Reviewed by Admin.