Kalay Peng Ah Hriamngan Hliamhnak In Thla Khat Chungah Tualchung Mi 7 Nunnak Liam

 


2023 June thla chung in Sagaing ramṭhen, Kalay peng ah SAC ralkap nih an thlahmi hriamngan ruangah ngakchia telh in minung 7 nunnak a liam i, 20 leng hliamhma an tuar tiah tualchung mi hna nih July 6 ah RFA ah an chim.

Kalaymyo hrambunh battalion 365 le khah lah yiah 228 ralkap hna nih hriamngan an thlah ruang ah sualnak ngei lo tualchung mi nunnak a liam i hliamtuar zong an tam. Nunnak liam mi le hliamhma tuar mi hna hi Kalaymyo khuachung le Kalay peng Tarsi, Santa, Htoma le Yelay U khua in an si hna.

SAC ralkap nih chun he zaan he hriamngan an thlah lengmang ruangah zaan ah cun biatak tein kan i ralrin a herh, mipi nun himnak ca ah thinphang ngai a si, tiah tualchung mi pakhat nih a chim. Hriamngan tam bik a tlaknak Kalay peng thlanglei ah cun bomb khor i cawh cio ding in kan forhfial hna, tiah Kalay peng hrambunh PDF nih an chim.

 Adang relchap :-

Bago ramṭhen le Karen ramkulh aa tonnak Taungoo-Thandaung lampi ah SAC ralkap motor run cu bomb kan puahhnawh hna i SAC ralkap 20 leng an thi, tiah People Defence Force Thandaung in ṭuanvo ngeitu pakhat nih a chim. A luancia June 24, zinglei suimilam 11:40 hrawng ah Taungoo in Thandaung lei a kalmi SAC ralkap motor 7 cu People Defence Force Thandaung nih Tapyi khua pawng ah bomb an puahhnawh hna. SAC ralkap 20 leng an thih pinah hliamhma tuar zong an tam, tiah theih a si.

"SAC ralkap hna cu an motor in an rat lio ah a pahnihnak motor cu bomb kan puahhnawh, motor chung cuang mi ralkap le an hriamnam tam lak cu leng ah an tla. SAC ralkap 20 leng an thi i bomb a puah hnu ah Tapyi khua pawng in Thandaung khua meng 13 aa hlatnak tiang an duhnak hmun poh ah meithal an kah" tiah People Defence Force Thandaung in ṭuanvo ngeitu pakhat nih Khit Thit Media ah a chim.

 Tanintharyi ramṭhen, Thayetchaung peng ah khuabawi le pyusawhti chungtel pakhat kahthah an tong, tiah Dawei information center in ṭuanvo ngeitu pakhat nih nihin Juluy 5 ah a chim. July 5, zinglei suimilam 8:00 renglo ah Thayetchaung peng, Nyaungzin khua ah pyusawhti chungtel Zaw Nine cu sianginn kam ah meithal kahnak hma he a thi i, chiatṭhat zohkhenh tu phu nih a ruak an laak, tiah theih a si. A thimi pyusawhti Zaw Nine hi SAC ralhrang he pehtlaihnak a ngeimi a si i, mizei hriamtlai nih an thah timi theihfian a si rih lo, tiah Dawei Information Center in ṭuanvo ngeitu pakhat nih a chim.

A luancia July 3, zanlei suimilam 4:00 tluk zong ah Thayetchaung peng, Kazi khua ah SAC ralhrang kuttang khuabawi ṭuanmi Nyo Soe cu mizei ti theih lo mi hriamtlai phu hna nih a inn ah luhhnawh in an kah caah hmakhat teah a thi colh. Kahthah a tongmi khuabawi Nyo Soe hi SAC ralhrang pawl lam a chimtu hna a si, tiah Dawei Information Center in ṭuanvo ngeitu pakhat nih a chim chih.

Post a Comment

0 Comments
* Please Don't Spam Here. All the Comments are Reviewed by Admin.