Myanmar Ram Caah Thawngpang Chia Tak Tak A Si Cang



Myanmar ram dirhmun cu chiat lei a panh chin ruangah European Union nih Myanmar rammi 6 le bu(Organization) pakhat cu phihkhamnak kan tuah ṭhan, tiah July 20 an thanh. Myanmar ram caah cun that lei nak in chiat nak lei ah a panh chin thluahmah cang ko. 


European Union nih an thanh ning ah SAC union ministers 3, SAC chungtel 2 le General pakhat cu phihkhamnak an tuah hna leng ah SAC kuttang Myanmar Mining Industry zong phihkhamnak an tuah, tiah theih a si. European Union nih Myanmar rammi 99 le Organization 19 phihkhamnak an tuah cang hna i cu hna vialte cu khualtlawn khawh lo dingin an kham hna pinah tangka thlen le kuat khawhnak zong an kham hna, tiah theih a si.


European Union nih Myanmar ram cu hriamnam le seh thilri, i pehtlaihnak seh thilri, ralkap le ramri hngak ralkap hna nih hriamnam ah an ser khawhmi thilri hna zong cawk khawh lo ding le phorh khawh lo dingin an kham pinah ralkap training an pek tawnmi hna zong an ngol, tiah theih a si. Cu pinah Myanmar cozah sinah bawmhnak a pek tawn mi a pe ti lo, tiah theih a si.


Thawngpang dang: Thailand thimnak ah teinak tambik a hmutu Pita le a party caah ruahchannak a um ti lo. Hmaizarh ah Prime Minister thimnak an tuah than lai nain, Move Forward Party hruaitu Pita cu ai tel kho ti lai lo. Parliament ah saulak debate an tuah hnu ah  715 members chung in 395 nih a voihnihnak thim than ti lo ding in an thimfung an thlak. 312 nih an cohlan, 8 nih a karlka. 


Pakhat, amah Pita, thimfung thla lo an si.  Thailand ram hi ralkap nih uknak a lak leng mang nak a si. U.S. zong nih fak pin dantat awk a tha lo. Zeiruang kan ti a si ahcun ralkap lei ahcun U.S. caah a biapi tuk. Nain zeitin dah Thailand mipi nih zeitin dah an cawlcangh lai timi bal te theihchung khawh asi rih lo.


Kawlram Buainak Kong Ka Hmuhning Ahmasabik ah, hi ka hmuhning hi a palhmi sehlaw ti ka duh. Atu ning tein thil a kal ahcun, kan ram buainak hi a khalmi buainak 'frozen conflict' timi dirhmun kan phan kho. Cu cu zei dah a si kan ti a si ahcun, buainak caan a rauh deuh tikah raldohnak cu a khal i a daimi bantuk a lo nain buaihnawhchan le ral rak ituk hnawh chan theipar par kha a chuak lo. Kap hnih lei in a daimi a lo nain a dai kho tak tak lo. Caan a rauh deuh cun, khuapi pawl cu a him deuh thluahmah lai i Ramri le tlangcung hmun deuh ah ikahnak a tam lai, atu hmanh cu dirhmun cu kan phan deng cang.


Hriamnaam bak in i tei ve ve ding le hram in i hloh ve ve ding cu a si kho lo tluk a si. Kap hnih lei caah arti in lungcumh bantuk khi a si ko hnga. Cu caah caan a rauh deuh deuh cun ramkip le hriamtlai phu cheu khat lila nih 'Peace Process' kha an dirpi than te lai. Phaisa le thazaang in Kawl ralkap pawl hi an tongh deuh tuk. Raltluknak ah siangpahrang 'king of the battle' timi cu ‘artillery’ hi a si. Cu zong ah tampi an thawng deuh. Ramdang he an i pehtlai kho rih. Vawlei thil chuak an duh poah in an sawk kho deuh rih.


Nain, mizapi lei tanpinak an ngei ti lo. An moral rawk tuk cang. Thih lai ke cheih bang an tuarnak a fak deuh si le mipi cungah fahnak kha an karh ter deuh deuh ve.  Dohthlennak a tuahtu phu pawl lei zong in zeimawzat cu ifuntom a si nain mah le thiam ning cio in cawl cu si kaw, thazaang ifunnak ah, ahleice in command and control, kan chambau. 


Kan thazaang kan fun kho lo. Tlangcung hriamtlai dirhmun in kan zoh a si zongah, Chin Ramkulh huap in kan zoh a si zongah. Micheukhat nih cun ifun kha an tih. Phukhat le phukhat izumh lonak a rak sang tuk. A ngan deuhmi Ngapi kio sa mi nakin Nga fate a hang din kha ilung hmuih deuh dawh a si. Phukomh hruai kho tu ding hruaitu an um rih lo ca zong maw a si zei dek. 


Kumhnih leng kan vun kal. Minung tampi nunnak a liam, a thong za za in ram cu chuah tak a si. Inn le lo thong tampi in an ciam. A chuak lomi mino tampi nih zalonnak caah tiin an nun cu an thap cuahmah ve. Upa tampi zong nih kan tei deng cang a ti a si. Nain teinak cu zeitin dah kan tah ning a si cio hnga, kan tahfung zong cu ai dang cio rih hnga. 


Kawlram buainak a donghnak ka hmuh ning cu hi ti hin a si. Hriam naam bak in tlu lak in ituk khawhnak thazaang cu khoika phu hmanhah a um lo tiah ka hmuh. Nain zei tluk in dah Kawl ralkap pawl an lung an i khah tilo timi cu ahohmanh nih fiang tein kan hngal kho lo. An chung lei in kuainak fak piin a chuah si cun fawi tein an tlu lai. Dothlennak tuahtu hriamtlai phu zong cu thiam thiam. Dohthlennak tuahtu hriamtlai chungah kuainak a fahtuk cun fawi tein a tlu ve lai. 


Hi bantuk in a khalmi buainak dirhmun kan phanh khawh caah, chanthar kan fale cawnnak le fimthiamnak ca zongah a tu tein hram kan phum a hau. I timhtuah kan hau. IT lei zong in tampi kan phum a hau. Cu vialte cu dohtlennak i a hliah le caang an si dih. Hi vialhi kum 70 chung Kawlram tuanbia zoh chih in le a tu kan dohthlennak a kal ning zoh tikah a mui thlam a lang khomi a si. Nain ka sahduhthah cu, hi ka ruahdamhnak hi palh sehlaw ralkap uknak cu tlu zok zok seh ti hi asi.

Post a Comment

0 Comments
* Please Don't Spam Here. All the Comments are Reviewed by Admin.