Tatkone Le Yawthit Khua Kahdohnak Ah SAC Ralkap Le Pyusawhti Lei 28 An Thi Le Thawngpang Dang



Magway ramṭhen, Pauk peng, Tatkone le Ywathit khua ah a ummi pyusawhti cu kan va kah hna i SAC ralkap 5 le pyusawhti 23 an thi, tiah Myaing peng rungvengtu Pah Kah Phah in ṭuanvo ngeitu pakhat nih a chim.

July 11 zing suimilam 5:00-6:45 tiang Tatkone le Ywathit khua ah a ummi pyusawhti pawl cu tualchung hriamtlai phu hna nih an va kah hna. Kahdohnak ah cun SAC ralkap, pyusawhti le palik pawl cu an zaam hna i, Ywathit khua um pyusawhti inn zong kan khangh pinah July 11 zing suimilam 8:00 luan ah SAC ralkap Mi 35 Helicopter nih a kan kah ve nain kanmah lei hliamhma pumi kan um lo, tiah Myaing peng rungvengtu Pah Kah Phah nih an langhter.

Pauk ah umhmun a khuarmi SAC ralkap nih 120mm hriamngan in voi tam tuk an kah ruangah Tatkone le Ywathit khuami hna zuatmi caw, na le innzuat saṭil cheukhat a thimi zong an um, tiah theih a si.

Kahdohnak ah tualchung hriamtlai phu lei in ralkap 3 hliamhma an pu i pyusawhti nih an tlaihmi tualchung mi 7 zong an chanh khawh hna. Kahdohnak ah cun Pauk peng YRF, Pakokku Battalion 11,18, PKU Earthquake, Pauk Pah Kah Phah, Myaing Pah Kah Phah Battalion 3, Company 2, 4 le a dang ṭangṭi phu hna i bawm in an kah hna i kutser meithal zun 7 zong an laak, tiah Khit Thit Media nih a ṭial.

July 12, zinglei sang Mizoram Lawngtlai peng Cheural khua ah tlangval pakhat a rianṭuannak hmun ah cansualnak tong in a nunnak liam tiah theih asi. Lawngtlai peng Cheural khua ah khuasa mi tlangval Lalsangliana hi a hawi le hna he innsaknak hmun ah grinder hmang in aa hlawhfa mi ansi hna tiah an chim.

Cansualnak tong mi Cheural khua tlangval Lalsangliana hi Sangau khua mipi sii-inn (PHC) ah tlikpi colh asi nain anunnak chanhmanh lo in aliam tiah an langhter. 


Vawlei cung tlangsang bik Everest tlaangkam ah Helicopter pakhat a tlak caah a chung um mi minung 6 an thi tiah Nepal ram cozah nih an feh ter.

Manang Air nih a ngeih mi Helicopter cu Nepal ram mi Pilot pakhat nih a mawngh i Mexico ram mi minung 5 he July 12 ni  zinglei ah Everest tlaang kam ah aa dawh ngai mi Vur tlaang zohding ah an kal hi a si. Mah hna pawl cu Solukhumbu district in an i thawh i an zoh duh mi tlaang an zoh dih hnu ah Kathmandu khuapi lei ah an khuallam peh dingin timhtuahnak an rak ngei. Asi nain an i thawh minute 10 hnu ah pehtlaihnak a cat.

Mibawmchan tu hna nih kawlhawl nak an tuah colh hna tik ah Everest tlang kam ah Helicoter a rawk mi cheukhat an hmuh hnu in aa cit mi minung 6 zong an thi tiah an feh ter. A thi mi ruak 6 zong an lak hna i Solukhumbu siizung ah an kal pi hna. Helicopter hi zeiruang ah dah a tlak timi an hngal kho rih lo tiah kan theih.


Post a Comment

0 Comments
* Please Don't Spam Here. All the Comments are Reviewed by Admin.