Tedim Peng, Taingen Khua Kahdohnak Ah SAC Ralkap 15 An Thi Adang Thawngpang



Tedim Peng, Taingen Khua Kahdohnak Ah SAC Ralkap 15 An Thi 


Chin ramkulh, Tedim peng, Taingen khua SAC ralkap sakhan cu Chin ralkap nih nizaan July 11 zinglei ah an va kah hna i cu kahdohnak ah cun SAC ralkap 15 an thi, tiah CDF CDM SIYIN in ṭuanvo ngeitu pakhat nih Delta News Agency ah fehternak he a chim.

"SAC ralkap umnak sakhan chung tiang kan luhhnawh hna i, ruak 15 kan hmuh, an hriam kan laak hnu kan chuahpah ah vanlawng nih an kan kah ruangah kanmah lei in ralkap 4 nunnak a liam i, kan laak ciami hriam zong kan thlak ṭhan," tiah ṭuanvo ngeitu nih cun a chim.

Chin ralkap lei in nunnak a liam mi hna cu CDF CDM SIYIN in ralkap pakhat, PDF Zoland in pakhat, Kalay PDF in pakhat le KKG B7 chungtel pakhat an si.

Taingen khua SAC ralkap umnak sakhan cu CDF CDM SIYIN, PDF Zoland, CNDF, TCDF, KKG B7, PDA le Kalay PDF S2 phufonh nih July 11, zinglei suimilam 5:30 hrawng in chun 12 tiang, suimilam 6 chung an kah hna. Taingen sakhan ah a ummi palik le SAC ralkap hi thazaang 40 in 60 kar an si lai tiah zumh a si.

"SAC ralkap hna umnak sakhan cu laak ding tiang in timhtuahnak kan ngei i an sakhan chung tiang zong kan lut kho nain kan i kah lio ah kan kuanfang nih a kan dihtak, hriamnam zong kan i tinzawh lo ruangah harsatnak tete kan tong," tiah CDF CDM SIYIN in ṭuanvo ngeitu nih cun a chim.

Tutan kahdohnak a chuahnak khua hi a luancia June 30 lio ah, mipi sinah a hlankan in ralrinnak pek an si caah kahdohnak ruangah tualchung mi hliamhma tuar an um lo, tiah a chimchap.

Hakha-Thantlang Kar Niruk Chung Kahdohnak Ah SAC Ralhrang 20 Tluk An Thi; 42 Siizung An Phan

Chin ram Hakha le Thantlang karlak ni ruk chung kahdohnak ah SAC ralhrang in 20 tluk an thi i hliamtuar mi 42 siizung an phan tiah CNA chimphuannak nawlngeitu Salai Htet Ni nih a chim.

"July 3 in 8 kar kahdohnak ah kan mah Chin ralkap lei in minung 6 hliam an tuar, ralhrang lei in 20 tluk an thi i hliamtuar mi 42 hna cu siizung an phan tiin kan theih. Ralhrang hna cu kahdohnak a chuah nak hmun in hnulei ah an pil cang nain Hakha tiang an kir maw timi cu kan hngal rih loh" tiah Salai Htet Ni cun a chim.

Ralhrang lei a thi le hliamtuar an tam caah tanglei in hriamngan le cunglei in raltuknak vanlawng nih voi 3 tiang Bom a thlak hnawh hna.

Hi kahdohnak chungah hriamnam phunli le kuan 1000 leng zong Chin ralkap nih an lak chih.

"Ralhrang pawl hi Thantlang ah thazaang chapding in rat an i timh hi a si. Thazaang an i chap khawh in duhsah tete in Thantlang peng hi humhak dingin an i zuam tiin kan ruah. A bik in Thantlang ralhrang bawmh le thazaang chap dingin an i zuam" tiah a cunglei upa nih a chimchap.


Aung San Suu Kyi Le Thailand Ram Foreign Affairs Ministry An I Tong



Thongthlak a tong mi Daw Aung San Suu Kyi he nai teah tonnak kan nei tiah Thailand ram Foreign Affairs Ministry Don Pramudwinai nih Indonesia ram ah tuah mi ASIAN ramchung Foreign Affairs Ministry pawl ton biaruahnak ah a mah pumpak nih a chim hi a si.

Japan ram Kyodo thawngzamh nih July 12 ni ah a cunglei bantuk in a langhter hi a si. 2021 SAC cozah nih uknak a lak hnu in Daw Aung San Suu Kyi cu a voikhatnak bik Thailand ram Foreign Affairs Ministry Don Pramudwinai he an i ton hi a si.

An rak i ton hi a luan cia July 9 lio ah a si i Daw Aung San Suu Kyi nih ASIAN Foreign Affairs Ministry pawl sin ah biacah a kuat mi zong a rel piak hna tiah thawngpang a leng nain fiang in theih a si rih lo.

Thailand ram Foreign Affairs Ministry Don Pramudwinai cu Indonesia ram tonpumhnak hlan ah a thli tein Naypyidaw ah a rak kal i a kal nak kong he pehtlai in thawngthanh nak zeihmanh an rak tuah lo tiah kan theih.


Taingen Khua Kahdohnak Ah Mipi Ralkap 4 An Nunnak Liam; SAC Ralhrang Thimi Zong An Tam Ngai



Chin ramkulh, Tedim peng, Taingan khua um SAC ralhrang sakhan cu mipi ralkap ṭangṭi phufonh nih luhhnawh in an kah caah kaphnih kar kahdohnak faak ngai a chuak i SAC ralhrang thimi le hliam a pumi an tam pinah hriamthil cheukhat zong mipi ralkap nih an laak khawh chih, tiah CDF CDM Siyin sin in theih a si.

July 11, zinglei suimilam 5:30 tluk ah tualchung hriamtlai ṭangṭi phufonh nih an kah hna hi a si i, chun suimilam 12:00 tluk tiang kahdohnak a chuak. Cu kahdohnak ah SAC ralhrang thimi le hliam pumi an tam pinah hriamthil cheukhat zong an laak khawh chih. Mipi ralkap ṭangṭi phufonh in pasalṭha 4 nih ram le miphun caah an nunnak an pek, 2 nih hliamhma an tuar, tiah theih a si.

SAC ralhrang lei an faak ngai ca ah raltuknak vanlawng in voi 3 tiang bomb a thlak. Cu pinah Kalay khuapi in hriamngan he voi tam ngai an kah bawmh hna, tiah theih chih a si.

Kahdohnak cu CDF CDM SIYIN, PDF Zoland+ B5 ME, CNDF, TCDF, KKG B7, PDA le PDF Kalay | S2 hna fonh in an si, tiah kan theih.




Post a Comment

0 Comments
* Please Don't Spam Here. All the Comments are Reviewed by Admin.