Zeiruang Ah Dah AA Nih Paletwa Hi Kan Ram A Si An Ti?

 


Biatlangvan 

Arakan Army (AA) a chuah hnu, a bik in AA le Kawl ralkap kahdohnak a chuah hnuin Rakhine miphun hna nih Paletwa cu kan ram a si tiah an chimrel ngai. Hihi naite lawngin a si lo i hlan deuh pi khan an chim pah cang. Free Ranger Burma (FRB) nih an rianṭuannak kong an chuah mi ca chung ah Paletwa cu Rakhine ram a si tiah an telh bal. RFB sinah hi kong a chimtu hi Chin miphun a si lo, miphun dang a si i a palh mi a si ti an theih hnuah RFB nih Paletwa cu Chinram a si tiah an ṭial ṭhan.

Paletwa peng sianginn catar (signboard) ah Chin ramkulh ti mi cu AA nih an hrawh i Rakhine ramkulh tiah an ṭial. Shan ramkulh Panglong khua ah tuah mi Ethnic Youth Conference ah Arakhan National Party hruaitu Dr. Aye Maung nih “Rakhine miphun kan hmunhma a si mi Paletwa cu 1953-1954 ah Chin Special Division ah an khumh” tiah a rak chim. Cu kong cu Facebook le media cahmai ah kan rel tikah lung a nuam lo ngai.

Rakhine nih Paletwa cu kan ram a si an ti tikah an i tlaih mi cu “Paletwa cu Arakan Hills Tract chung ah a rak um” ti hi a si. Cheukhat nih Rakhine siangpahrang chan in a um cang an ti fawn.

Thazang in tei  (Might is right)

 “Might is right” ti hi a tawinak in kan fianter ahcun “thazang a ṭhawng mi nih a dik mi lam in siseh a dik lo mi lam in siseh a duh mi paoh a tuah khawh” tinak khi a si. Phundang in chim ahcun thazang hmangin uk le hruainak khi a si. A voihnihnak ralpi tiang kha “Might is right” ti mi phunglam hi vawleicung hmunkip ah an rak hman.

Myanmar tuanbia kan zoh tikah a ṭhawng mi miphun nih a tlawm, a der mi miphun kha an doh i an lak lengmang hna ti hmuh khawh a si. Rakhine miphun zong siangpahrang a ngei i anmah tein aa uk mi an rak si ko nain Mirang an luh hlan 1784 ah Kawl siangpahrang nih a lak cang. A voikhatnak Kawl-Mirang dohnak (First Anglo-Burmese War) lioah Kawl siangpahrang nih Rakhine ram cu ralsungh man (War Reparation) caah Mirang cozah sinah a rak pek. Cuticun Rakhine ramkulh cu 1826 ah Mirang uknak tangah khumh a si.

 Mirang an kai hlan ah Mon le Rakhine dah ti lo tlangcung miphun dang hna cu mahle phunglam ning tein aa uk mi ram an rak si. Mirang nih 1885 ah Myanmar cu a dihlak in an lak i Tibaw siangpahrang zong India ah an ṭhawl diam.

Chin miphun zong 1890 an kan doh ve. Britist chan ah khan atu i Pakistan, India, Bangladesh, Sri Lanka le Burma (Myanmar) cu Britist-India tiin umnak pakhat tang ah an rak chiah. Burma Act 1935 ningin 1937 ah Burma cu Britist-India in an ṭhen i Britist-Burma tiin a dang tein an chiah ṭhan.

 Britist nih Myanmar cu ukning phun 3 in an uk. Ministerial Burma (Proper Burma ti zongin an auh) ah Taninthari, Rakhine, Bago le Ayeyarwady hna an i tel. Cun Frontier Areas (Scheduled Areas ti zongin an auh) ah Shan, Kachin le Chin miphun hna umnak hmunhma vialte an i tel. Kaya (Karenni) hi zei ram/cozah hmanh nih ukchih mi ram a si lo nain Britist nih zohkhenh mi dirhmun in a zalen mi ram a rak si. 

Frontier Areas

 Britist chan ah tlangcung hmunhma (frontier areas) ti mi cu Ministerial or Proper Burma ah aa tel lo i Kaya bantukin a zalen mi ram zong a si fawn lo mi hmunhma hna kha chim duh mi a si. Frontier Areas an chiahnak hi a ruang tampi a um. Britist cozah aiawhtu hna le tlangcung miphun uktu hna hnatlaknak ningin Britist nih an rak uk hna.

 Tlangcung miphun hna nih nih cun anmah he ramri aa peh mi rawn a um mi kha an rak doh tawn hna. Cucu kham khawh nakding ah phunglam an rak serpiak hna. Chin miphun caah

Chin Hills Regulation Act (1896) an ser i cu ningin cu Britist nih Chinram cu an uk. Hi Chin Hills Regulation Act (1896) nih Chinram lawng si loin Mizoram le Nagaland zong a huap.

Tlangcung ah khua a sa mi Chin miphun hna

 Hlanlio pi in atu i Myanmar ram hmunkip ah Chin miphun hna cu an rak um. Cheukhat cu rawn ah an um (Asho Chin tibantuk). Cheukhat cu tlangcung ah, cheukhat cu tiva kam ah tiin an rak um hna. Cucaah Frontier Areas ah a um mi Chin miphun hna cu Chin Hills District le Arakan Hill Tracts inn hmunhnih ah an ṭhen i an uk.

  Frontier Areas Committee of Enquiry (FACE) nih 1941 ah hmunhma a bit-kauh le milu tlawm-tam cazin an lak mi cu a tanglei bantukin a si. Hi milu cazin hi 1941 ah an lak mi a si nain a voihnihnak ralpi lio ah an cazin vialte a tlau dih i 1931 milu cazin kha zohchih in 1941 tiangah milu a karh kho zat an tuak mi a si.

Chin Hills District

Hmunhma bit-kauh: mengkulh 10,337

Milu dihlak: 186,000 (Chin 183,768, zatuak 98.8%, miphun dang 2,232, zatuak 1.2%)

“Kanpalet Subdivision in the south of the District has close ties with the neighboring Chin population in Ministerial Burma” tiah an ṭialchap fawn. Cucaah Chin miphun hna cu Chin Hills District lawngah si loin Ministerial Burma chung zong ah an um ti khawh a si.

Arakan Hill Tracts

Hmunhma bit-kauh: mengkulh 3,543

Milu dihlak: 34,000 (Chin 2,577, zatuak 75.8%, Kawl 3,570, zatuak 10.6%, miphun dang 4,624, zatuak 13.6%).

  “The Burma Group of the population who are Arakanese Buddhists nearly all live in southern part the tract bordering to Arakan Division”. tiah a tang ah an ṭialchap ṭhan. Miphun dang an ti mi kha zei miphun dah an si ti hngalh a si lo nain Arakan Hills Tract ah a um mi Rakhine miphun cu zatuak 10% lawng an si tiah an langhter.

Curuangah a fiang mi cu Frontier Areas chung ah a um mi “Arakan Hills Tract” ti mi cu hmunhma min lawng a si i Rakhine ram sinak he zeihmanh aa pehtlai lo. Arakan Hills Tract cu Chin ramkulh chung ah a um i kan pupa hna chan in Chin miphun an umnak hmun a si.


Post a Comment

0 Comments
* Please Don't Spam Here. All the Comments are Reviewed by Admin.